Агаарын бохирдлыг эсэргүүцэж залуус флаш моб бүжиглэнэ

Агаар болон хөрсний бохирдлын улмаас хүүхдүүдийн дунд халдварт, хавдрын шинжтэй өвчлөлүүд нэмэгдэх болсон. Тиймээс зуу гаруй залуус нэгдэн эсэргүүцлээ илэрхийлэн өнөөдөр  Д.Сүхбаатарын талбайд флаш моб зохион байгуулах юм байна. Эдгээр залуус Цагаан өнгийн амны хаалтаар ижилсэх бөгөөд балет, зумба, латин бүжиг, брек дэнс, электро зэрэг бүжгийн олон төрлийн үзүүлбэр хийх ажээ. Тус арга хэмжээг "Мөрөөдлийн эмэгтэйчүүд" ТББ санаачилж байгаа бөгөөд "UB dance school" Нийслэлийн нутгийн зөвлөл, "Инээдэг маск" хөтөлбөр, МҮОНРТ хамтран зохиохоор болсон байна.

Олон хүн нэгэн зэрэг ижил үйлдэл хийхийг флаш моб гэж нэрлэдэг бөгөөд үүгээрээ бусдын анхаарлыг татах зорилготой юм. Дэлхий нийтэд олон нийтийн байгууллага, корпораци, компаниуд шинэ бүтээгдэхүүн танилцуулах, олон нийтийи анхаарлыг байгаль, экологийн асуудалд хандуулахын тулд флаш мобыг ашигладаг жишиг тогтоод буй.