Ахмадын футзалын цомын тэмцээн болно

Монголын Хөлбөмбөгийн Холбооноос жилд 2 удаа ахмадууддаа зориулан тэмцээн уралдаан зохион байгуулдаг юм. Хөлбөмбөгийн ахмадуудаа сар шинийн баярын тэмцээний өмнө футзалын спортоор уулзуулан баярлуулах, ахмадууддаа хүндэтгэл үзүүлэн сар шинийн баярын бэлэг гардуулах, залуу үеийнхэнд тэдний хөлбөмбөгийн гайхамшигт тоглолт, техникийг үзүүлэн, ур чадварыг харуулах явдал нь цомын тэмцээний гол зорилго байдаг. Энэ жилийн Ахмадын футзалын цомын тэмцээн ахмад хаөлбөмбөгчин, спортын мастер Равсалын Энхбаярын нэрэмжит болгон зохион байгуулж байна. Хөлбөмбөгийг Монгол улсад хөгжүүлэх үйлсэд ахмад хөлбөмбөгчин Р.Энхбаяр ихээхэн үүрэг гүйцэтгэсэн билээ. Түүний алдар хүндийг мөнхжүүлэх, хойч үедээ таниулах зорилгоор ийнхүү энэхүү эрхэм хүний нэрэмжит болгон энэ удаагийн тэмцээнийг зохион байгуулахаар шийдвэрлэсэн юм. Цомын тэмцээн 40-45, 46-50, 51-55, 56-аас дээш гэсэн 4 насны ангиллуудаар Монголын Хөлбөмбөгийн Холбооны Футзалын ордонд 2013 оны 1 дүгээр сарын 30-ны өдрөөс эхлэн явагдах ажээ.Одоогийн байдлаар тэмцээний 40-45 насанд нийт 15 баг, 46-50 насанд 6 баг, 51-55 насанд 6 баг, 56-аас дээш насны тэмцээнд 7 баг, нийт 34 багийн 340 гаруй ахмад хөлбөмбөгчид өрсөлдөхөөр хүрэлцэн ирсэн байна.  Хөдөө орон нутгаас Хөвсгөл, Дорноговь, Орхон, Дархан-Уул аймгуудаас азай буурлууд хүрэлцэн ирсэн байна.Нэгэн ёсны “Ахмадын хөлбөмбөгийн баяр” 2013 оны 2 дугаар сарын 03-ны өдөр дүнгээ гаргах юм байна