"Universe Best Songs 2013" наадам 5 дахь жилдээ

Өнөөдөр UBS телевизээс эрхлэн зохион байгуулж буй Universe Best Songs-2013 наадмын  хэвлэлийн бага хурал өчигдөр болж өнгөрлөө. Хуралд UBS телевизийн ерөнхий редактор Ө.Гэрэлцэцэг, ерөнхий найруулагч Д.Отгонзаяа, маркетингийн албаны дарга Г.Батсайхан, хөтлөгч Э.Гантулга болон 2012 оны гран-при шагналт Э.Төгсбаяр нар мэдээлэл өгсөн юм. Одоогоор 510 оролцогч энэ жил бүртгүүлсэн байна. Мөн тус наадамд Норвеги, Солонгос, Орос, Турк, Хятдад сурч буй Монгол оюутан залуус болон Хэнтий, Дархан, Эрдэнэт зэрэг хөдөө орон нутгийн авъяастнууд орохоор бүртгүүлсэн ажээ. Жил болгон өөр өөрийн гэсэн өнгө аястай байдаг тус наадмын энэ жилийн эрхэм уриа бол Хүндлэе, Хайрлая, Инээмсэглэе гэсэн содон бөгөөд гайхалтай уриа болж чадсан байлаа. Энэ жилийн наадмын бас нэгэн онцлог нь өмнөх жилүүдэд шилдэг 25-н оролцогчыг шалгаруулдаг байсан бол энэ удаад шилдэг 15-н оролцогчыг шалгаруулж цаашдын уран бүтээлийг нь дэмжиж ажиллахаар болсон аж. Ийнхүү тэмцээнд оролцохоор бүртгүүлсэн нийт 510 авъяастандаа амжилт хүсье.   

                                                                                                                  Д.Жадамба, Б.Төгөлдөр