“Булсара” тоглолтоо хийнэ

“Ийм л байг”, “Жихүүн бороо”, “Bleeder and leader” тэргүүтэй дуугаараа рок хөгжмийн шүтэн бишрэгчдийг байлдан дагуулж, Монголын амьд хөгжмийн ертөнц дэх хүндтэй хамтлагуудын нэг болсон “Булсара” энэ жил 10 жилийн ойтойгоо золгож байна. Рокерууд 10 жилийн ойн тоглолтоо уламжлалт буюу нүргэлсэн чанга хөгжим, толгойгоо савах фэнүүдтэйгээ бус илүү даруу бөгөөд шүтэн бишрэгчидтэйгээ дотно байдлаар хийхээр төлөвлөжээ. Тэдний ойн тоглолт ирэх сарын 8-нд “Blackbox” театрт анплаггед хэлбэрээр хүрэх аж. Тасалбарын үнэ 50 мянган төгрөг бөгөөд ердөө 200 хүний суудал байх юм. Тиймээс хамтлагийн үнэнч шүтэн бишрэгч, сонсогчид тус театртай холбогдон тасалбараа авах боломжтой гэнэ.